ERRIGORA EUSKARARI PUZKA

“Nafarroako erriberako uzta euskarari puzka”. ERRIGORA egitasmoren udazkeneko kanpaina abiatuko da urriaren 25ean! Nafarroa hegoaldeko tokiko produktuak gure artean saltzearen truke, jasotakoaren %25 zonalde hartako euskalgintza laguntzera bideratuko duen ekimena da ERRIGORA.

Aurtengoan ere bi kutxa izango dira aukeran: ZURIA eta BELTZA. Bakoitza 50€ren truke. Beltza Errigoraren hastapenetakoaren harira, Zuria berrikuntzak biltzen dituena. 23 etxek eskainiko dizkigute haien produktuak. Dozenaka langile. Ehunka nekazari. Bada familia!

Saskiek 50 euroko salneurria dute eta bertan datozen produktuak hauek dira:

  • Saski beltza: oliba-olio birjina, ozpin ekologikoa, ardo ekologikoa, muxika almibarrean, orburu-bihotzak, potxak, mahats-zuku ekologikoa, pikillo-piper osoak, borraja ekologikoa, zainzuri zuriak, piper txorizero mamia, tomate frijitua eta arbendolak.
  • Saski zuria: Txokolatezko gailetak, ardo eta kanela pastak, teilak, arroza, pasta ekologikoa, zainzuri zuriak, zainzuri-krema, orburuak, pikillo-piper osoa, pikillo saltsa, piperrada, ozpin ekologikoa, eta ardo ekologikoa.

Aurtengorako egin den bideoa webgunean ikus dezakezue.

Kanpainaren aurkezpena Iruñan egongo da urriaren 24an. Saskiak urriaren 25etik azaroaren 14ra egongo dira salgai. Kutxen banaketa azaroaren 29tik abenduaren 4a bitarte egingo da. Ordainketa kutxa jasotzean egin beharko da.

Jakina den moduan, Errigora ekimenak sustatutako kanpaina honetan bildutako dirua eskualde horretako euskalgintzara bideratuko da.

Azaroaren 12a bitarte, Euskal Herri osoan Nafarroako Erriberako nekazaritza-produktuekin osatutako otarren eskaera egin ahal izango da.